Боку ва Ереван дар бораи оташбас дар Қарабоғ тавофуқ карданд

Озарбойҷон ва Арманистон доир ба оташбас дар Қарабоғи Кӯҳӣ санаи 10 октябр соати 12:00 тавофуқ карданд. Дар ин бора вазорати корҳои хориҷии Озарбойҷон хабар додааст. Дар Маскав байни вазирони корҳои хориҷии Озарбойҷон ва Арманистон Ҷайҳун Байрамов ва Зограб Мнатсаканян созишномаи оташбас ба имзо расид.

Мулоқоти онҳо бо миёнаравии вазири умури хориҷии Русия Сергей Лавров пушти дарҳои баста баргузор шуд ва беш аз даҳ соат идома кард. Ҷаласа шоми шанбеи санаи 10-уми октябри соли 2020, ба поён расид.

Ҷонибҳо дар бораи қадамҳои зерин ба мувофиқа расиданд:

1) Созишномаи оташбас аз соати 12: 00-и 10 октябри соли 2020 бо мақсадҳои башардӯстона тибқи меъёрҳои Байналмилалии Салиби Сурх барои табодули асирони ҳарбӣ ва дигар маҳбусон ва ҷасадҳои фавтидагон эълон карда мешавад;

2) Параметри мушаххаси расмиёти оташбас ба таври иловагӣ мувофиқа карда шудааст;

3) Ҷумҳурии Озарбойҷон ва Ҷумҳурии Арманистон тавассути ҳамраиси Гурӯҳи Минскии САҲА музокиротро дар асоси принсипҳои асосии созишнома оғоз мекунанд, то ҳарчи зудтар созишномаи сулҳомез ба даст ояд;

4) Ҷонибҳо тасдиқ мекунанд, ки шакли раванди гуфтушунид тағир нахоҳад ёфт «гуфта шудааст дар изҳороте, ки Сергей Лавров дар бораи натиҷаҳои машваратҳои сеҷониба хондааст.

Ҷанг дар Қарабоғи Кӯҳӣ 27 сентябр оғоз ёфт. Дар якчанд қисмати фронт задухӯрдҳо байни сарбозони Озарбойҷон ва Арманистон ҷараён дорад. Дронҳо, артиллерия, техникаи вазнин ва системаҳои мушакӣ истифода шуданд. Дар ду тарафи фронт шаҳрвандон тирборон карда шуданд, ки даҳҳо нафарро куштанд.