Ойинадорӣ

Баҳор ойинадори рӯзгор аст,
Шикасти ранг ҳам худ як баҳор аст.
Парафшони ҳавои нестӣ бош,
Замин бо лолазорон доғдор аст.

Муаммо дар муаммоям, чӣ пурсӣ,
Дарахти нотавониро чӣ бор аст?
На оҳанге маро буду на чанге,
Гувоҳи ҳол дар роҳам ғубор аст.

Саҳар афсона, шаб фарёд дорам,
Маҳу хуршедро ҳам ошкор аст.
Дилогоҳӣ ба ранге сӯхтан дошт,
Ҷаҳон аз миннаташ дар эътибор аст.
Хаёлам мебарад ҷое, ки ҷо нест,
Чи медонад, ки олам шармсор аст.